Mədəniyyət

Azərbaycanın ilk İnklüziv İncəsənət Məktəbində əl işlərinin sərgisi açılıb (FOTO)

Bakı. Trend:
DOST Agentliyinin 4 saylı Bakı DOST Mərkəzində Azərbaycanın ilk İnklüziv İncəsənət Məktəbinin 3 aylıq kurslarını bitirən əlilliyi olan tələbələrin əl işlərinin sərgisi açılıb.
​​​Əmək və Əhalinin Sosial Müdafiəsi Nazirliyindən Trend-ə verilən məlumata görə, 30 iyun saat 13:00-dan 16:00-dək, 1-2 iyul saat 11:00-dan 16:00-dək olmaqla üç gün davam edəcək sərgidə 26 tələbənin 300-dən çox əl işi nümayiş olunur.
Sərginin açılışında Dövlət Məşğulluq Agentliyinin İdarə Heyətinin sədri Mustafa Abbasbəyli, Azərbaycan Respublikasının Birinci vitse-prezidentinin Katibliyinin nümayəndəsi Fərqan Abbaszadə və BMT-nin İnkişaf Proqramının Rezident nümayəndəsi Alessandro Frakassetti, həmçinin tələbələr, valideynlər, müəllimlər və media nümayəndələri iştirak ediblər.
Qeyd olunub ki, Azərbaycanın ilk İnklüziv İncəsənət Məktəbi Azərbaycan Respublikasının Birinci vitse-prezidenti Mehriban Əliyevanın təşəbbüsü ilə icra olunan “Əlilliyi olan qadınların və Qarabağ müharibəsi veteranlarının hüquqlarının və rifahının təmin edilməsi” layihəsi çərçivəsində yaradılıb. Layihə Əmək və Əhalinin Sosial Müdafiəsi Nazirliyi, BMT-nin İnkişaf Proqramı və BMT-nin Əhali Fondu tərəfindən birgə icra olunur.
4 saylı Bakı DOST Mərkəzində yerləşən İnklüziv İncəsənət Məktəbində əlilliyi olan tələbələrə əlilliyi olmayan tələbələrlə birlikdə rəsm, toxuculuq və ağac üzərində oymaçılıq üzrə bilik və bacarıqlar öyrədilir. Məktəb hamı üçün müyəssərliyi nəzərdə tutan universal layihələndirmə prinsipi əsasında hazırlanmış mebel və avadanlıqlarla təmin edilib. İnklüziv İncəsənət Məktəbi tələbələrə yeni bacarıqlar və biliklər verərək, onların özünüməşğulluq imkanlarını artırır.

Məktəbdəki kurslara daxil olmaq istəyən hər kəs https://bit.ly/3wn6gq5 linkindəki ərizə formasını dolduraraq müraciət edə bilər.
Keçirilən sərgi əlilliyi olan şəxslərin istedad və bacarıqlarının cəmiyyətə tanıdılması, onların yaradıcılıq imkanlarına, fəaliyyətlərinin stimullaşdırılmasına, cəmiyyətə inteqrasiyasına dəstək verilməsidir.
Sərgidə nümayiş olunan əsərlərin satışı da nəzərdə tutulub və satışdan toplanan vəsait birbaşa olaraq məktəbin tələbələrinə təqdim ediləcək. Nümayiş olunan əl işləri ilə Bacarıqların İnkişafı və Tədris üzrə Virtual Laboratoriya (V-Lab) www.vlaboratoriya.sosial.gov.az platformasındakı elektron kataloq vasitəsilə də tanış olmaq mümkündür.

TREND

Bənzər yazılar

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

Back to top button