Dünya

Nyu-Yorkun ən izdihamlı yerlərindən birində Azərbaycan bayrağı ucaldılıb

ABŞ-ın Nyu-York şəhərində şərqdə ilk demokratik respublika olan Azərbaycan Xalq Cümhuriyyətinin yaranmasının 103 illiyi münasibətilə Azərbaycanın dövlət bayrağı ucaldılıb.
“Report”un yerli bürosu xəbər verir ki, Azərbaycan bayrağı Nyu-Yorkun maliyyə mərkəzi hesab olunan və turistlərin ən çox ziyarət etdiyi küçələrdən birində – “Wall Street”də yerləşən “Bowling Green” parkında nəhəng bayraq dirəyindən asılıb.
Azərbaycan-Nyu-York Assosiasiyasının təşəbbüsü və Diasporla İş üzrə Dövlət Komitəsinin dəstəyi ilə baş tutan proqramda Nyu-Yorkda yaşayan Azərbaycan icmasının fəalları və Azərbaycanın BMT-dəki Daimi Nümayəndəliyinin əməkdaşları iştirak ediblər.
Azərbaycan bayrağını nəhəng bayraq dirəyinə Azərbaycan-Nyu-York Assosiasiyasının sədri Ərcan Yerdələnli və ölkəmizin BMT yanında Daimi Nümayəndəsinin müavini Tofiq Musayev tərəfindən qaldırılıb.
Azərbaycan dövlət himninin sədaları ilə ucaldılan dövlət bayrağımız yaxınlıqdan keçən turistlərin diqqətini çəkib. Onlar həmvətənlərimizə yaxınlaşaraq, ölkəmiz haqqında məlumatlar alıblar. Yağışlı hava şəraitinə baxmayaraq, milli geyimlərlə tədbirə qatılan azərbaycanlı gənclər musiqi sədaları altında rəqs edib, turistlərə milli atributlarımızın əks olunduğu hədiyyələr təqdim ediblər.
Qeyd edək ki, Nyu-York şəhərinin ilk rəsmi parkı olan və nəhəng bayraq meydanı olaraq tanınan “Bowling Green” park bu gündən etibarən 10 gün müddətində Azərbaycan bayrağına ev sahibliyi edəcək.
Vüsalə Abbasova

REPORT

Bənzər yazılar

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

Back to top button